بەجێم هێشتی!                                                               

 

لە زمان دادە خەجێ وە، بۆ دادە حومەیرا؛

                                                                               بە چەند رۆژێک

                                                                               پاش کارەساتی خامۆش بوونی!!

 

بەجێم هێشتی و

ماڵاوایي

ئاسایي بوو!

بەتەمابووم

کە دوایي بێیتە پێشوازم؛

باوەشی گەرمی خۆشکانە…

نەک ئاوا، سارد!!!

مەگەر خۆت نەت وت “بەخێرچی”؟؟

ئەی بۆ شێوانت باوانم؟؟

ئەی بۆ سارد و سڕە، ئێستا، باوەشی گەرمی دایانم؟؟

جووتە-خوشکێک بوون، من و تۆ،

وەک جووتێک چاو!

ئێستا، چۆن چاوم هەڵێنم؟؟

چۆن تەنیا-باڵ و تەنیا-چاو،

چۆن تەنیا، باڵ بوەشێنم؟؟

چلۆن ئێستا،

میوانداري

میوانە خۆشەویستەکانت کەم؟؟

*

ئۆفف؛ جێم هێشتی!!!

کە هاتمەوە،

ئینساف نەبوو…

باوەشی سارد…

بەتەما بووم

بە باوەشی گەرمەوە؛ وەک جاران…

بێی بە پیریمەوە، دیسان…

کەچی

تەنیا

زەردەیەکی نەرم و نیان

لە پشت شیشەی ساردی قاپە عەکسێکەوە!!

بۆ کوێی ببەم؟؟

چی لێ بکەم؟؟

٢٠١٤٠٢١٧