سوار دابەزێ و پیادە-سوار

بۆ یادی سەدوپەنجاساڵەی کۆمۆنی پاریس 🙂

(روونکردنەوەیەکی کورت:
 فۆرومی ئێکونۆمي جیهاني:
World Economic Forum،
بە بۆنەی کۆرۆناوە، قسە لەوە دەکەن کە ئێکۆنۆمی دنیا،
Great Reset  (ریسێت ی گەورە) بکرێتەوە،
 ئابووري جیهاني، سەر لەنوێ و لە ڕگەوە، دامەرزێننەوە!
من لێرەدا، Resetم کردووە بە “داچنینەوە”
وەک چۆن داشەکانی شەترەنج دادەچنینەوە؛
ئەم شیعرە باسی ئەو داچنینەوەیە)
 
 
 
کۆرۆنا پاشقولی داون
بەزم و بازاریان شێواوە
              شپرزاون!
قاویان داوە:
           بەتەمای داچنینەوەن!
پاش شێوانی بەزم و بازاڕی نگریسیان
        باسی داچنینەوەی مەزنی
 داشەکانی شەترەنجی شپڕێویان دەکەن!
بەڵام ئێمە، خۆ، لەمێژە
        خەریکی داچنینەوی مەزنی ئەم گۆڕەپانەین!
سەد و پەنجا ساڵ پێش ئێستا،
         کۆمۆنەی پاریس، فەرەنسا،
         دامان بەژێر تەختەی شەترەنجی جیهانا؛
         ئەوە ئێمە بووین ئەو کاتە،
              داچنینەوەی مەزنمان لە هەڵڵا دا!
بۆ دامەرزانێکی نوێ؛
دامەرزانێک
         بێ شا،
         بێ وەزیر و بێ فیل،
                     بێ فیل سوار؛
         بێ قەڵا و پەستوو و پەناگای دەسەڵاتیان!
وتمان: ئەرێ؛
                  سوار، ئێتر ئەبێ دابەزێ!
                                     سوار دابەزێ و پیادە سواربێ!
//////\\\\\
بە شۆڕشەکەی ئۆکتۆبریش
        جارێکیتر
         سوارمان کێشایە خوار لە زین؛
         پیادەی خۆمان
         هەڵمان کوتایە سەر تەختی دەسەڵاتی گشت-گۆڕەپان؛
                     هەمان-کات، لە هەڵڵامان دا: پیادە-سوار!
ئێستا بەڵام،
           زۆڵم و زۆر و هەڵاواردن و تاڵانیان
           بە پانایي هەموو جیهان
           ڕێگای هەناسەی لێ گرتووین؛
           گیانیان گەیاندوەتە لێوان،
‌هێشتاش ئاوا بێشەرمانە،
           بەتەمان تێهەڵکەنەوە و
                               شەترەنجە شپڕێوەکەیان
                                                              جارێکیتر داچننەوە؟!
////\\\\
بەسیە ئیتر!
            با داچڵەکێن؛
            با بزانن!
با بزانن:
کات، کاتی هەڵپێچانیانە؛
                نەک داچنینی سەرلەنوێی
                                  شەترەنجی شڕ و شپڕێوی دەسەڵاتیان!
//////\\\\\
بەڵێ؛
        بێن دایچنینەوە
             لەڕگەوە!
             داچنینەوەی حەقەتي و هەرە مەزن:
                      با سوار، یەکجاري، دابەزێ و
                                  پیادە سواربێ!