|
سولەیمان محمدي،
تێکۆشەرێکی کومۆنیست و
ڕێبەرێکی خەباتی کرێکارانی کوورەخانە
گەلاوێژی ١٣٦٥؛ سپتەمبری ١٩٨٦؛
کەوتە بەر کارەساتێکی تیرۆریستي
حیزبی دیموکراتی سەرمایەداران و
گیانی بەختکرد.
شیعرەکەم لا نەمابوو؛
یەکێک لەهاوڕێیانی دێرین،
لە ئارشیوی خۆی دۆزییەوە و ناردی بۆم؛
بەسپاسەوە لەم هاوڕێیە، دیسان بڵاوی دەکەمەوە:
پەنجەیەک بوو
پەنجەکانیترمی فێرکرد،
ببن بە مست،
پۆزەی بەهەڵپەی تاڵانکەر
لە خوانی خێزانی برسیم
دوورخەنەوە!
پەنجەیەک بوو
دەستمی فێرکرد
کە دەستی هاوماڵەکانم
گەرم و گوڕتر، بگرمەدەست!
پەنجەیەک بوو
نەبزی مەچەکمی ئەگرت و
ئازارەکانمی ئەڕەواند؛
ئاواتەکانمی ئەناسي؛
ئاڵۆزاوي تاڵەکانی،
ئارام ئارام ئەکردەوە و
بێ گرێ و گۆڵ
لەگەل ئاواتی هاوماڵان
ئەیهۆنیەوە؛
ئارامی ژانی مناڵی نەخوشم بوو
لە گەرمەژانی پڕ-ئێشا؛
پەنجەیەک بوو
گوڵی لامپای ژوورەکەمی
هەڵ-ئەکێشا؛
پەنجەی پیرۆزی ئیشارەت
ئیشارەتی بەشارەت بوو
بۆ رزگاري
نیشانەی دەریای وشیاري؛
***
پەنجەبووین، کردینی بە مست!
هەرکام، دەستێکی لاواز بووین
لێکی هەڵپێکاین؛ هەزاران؛
بێ هێز بووین،
بەهێزی کردین؛
دابێینەوە
تارێنەری پؤزەی تاڵان
کاتێک کە ئێمە، سەرتاپا، خەریکین بینە هەڕەشە
ئاڕاستەی جەستەی تاڵانکەر،
دێوی دزێوی هەزار-سەر
سەرچاوەی ڕەنج،
ڕووناکي-کوژ،
سۆما-خنکێن،
ئەو دێوەی وا
چنگی چەپەڵی چەتوونی هاویشتووەو
گەش-ئەستێرەی بەوریشەی
لە ئاسمانم ڕفاندووە!
ئەو دێوەی وا
چاوی، چەواشەیە لە ئاست شەوقی چرام،
چنگاوشی دەستم بووەو
پەنجەی، ئاوا، چرا-گرمی
شکاندووە!!
***
هۆ چنگی دز!
هۆ چنگی چەوت!
دەستی پەستی چەتەی چەتوون
کە ژانی مەرگ ئەتجووڵێنێ،
گوڵی سولەیمانت ژاکاند
بەڵام بۆ گوشینی گەرووت
من شێر-پەنجەی هەزار-پەنجەم!
ئاسمانێکم پڕ-ئەستێرە
نووخاومەتەوە بە سەرتا!
عەرزێکی پان و بەرینم
پڕلە بورکان
تەقیومەوە لە ژێر پێتا!
لەم سەر-عەرزە و ژێر-ئاسمانە
-ئەی دەرەتان-کوێرەوە-بوو!
لە کوێ سەری پیرە-مەرگي ت ئەنێیتەوە؟!
ڕێبوار؛
٣١ی٦ی١٣٦٥
|